بینک سے لون لینے کا شرعی حکم – بینک سے لون لینا کیسا ہے

 مسئلہ: بینک سے لون لینے کا شرعی حکم 

 کیا فرماتے ہیں علمائے دین و مفتیان شرع متین مسئلہ ذیل میں۔۔۔

دور حاضر میں بینکوں میں مسلم اور غیر مسلم سبھی کی مخلوط رقم جمع ہے کیا اس صورت میں اپنی ذاتی ضروریات،دینی و ملی خدمات نیز دینی و عصری تعلیم کی نشر واشاعت کیلئے ۔۔ موجودہ بینکوں میں جمع مخلوط رقم سے لون لیا جاسکتا ہے؟ 

 دلیل نقلی وعقلی کی روشنی میں مدلل و مفصل جواب عنایت فرماکر عند اللہ ماجور ہوں

المستفتی: محمد ارکان رضوی امروہوی۔۔

 

  بِـسْمِ الـلّٰـهِ الـرَّحْـمٰـنِ الـرَّحِـيْـمِ.   

الــجـواب بـعـون الـلـه الـعـليم الـوهـاب وهـو الـمـوفـق لـلـحـق  و الــصـواب :

اگر بینکوں سے لیا جانے والا لون شرعی طریقہ پر ہو یعنی اس میں سود، رشوت، غدر ،بدعہدی وغیرہ مفاسدِ شرعیہ نہ ہوں، نیز وہ روپئے جو بینک سے بطورِ قرض لیے جائیں بعینہ وہ ایسا مالِ خبیث نہ ہوں کہ ان پر مقرِض کی ملکیت ہی نہ ہو جیسے غصب، سود، رشوت یا چوری وغیرہ کا مال، تو ذاتی و خانگی، قومی و ملی، دینی و علمی، اور تجارتی و کاروباری کسی بھی حاجت و ضرورت کے لیے قرض لیا جاسکتا ہے، بینک میں مسلم و غیر مسلم دونوں کی جمع کردہ رقم کے مخلوط و غیر مخلوط ہونے سے قرض کے جواز و عدمِ جواز پر کوئی فرق نہیں پڑتا، بلکہ بینک یا کسی فرد کے پاس حرام و حلال دونوں طرح کا مال مخلوط و موجود ہو تو جب تک مالِ حرام پر عقد و نقد کا اجتماع نہ ہو اس مال کو قرض، ثمن، ہبہ ہدیہ وغیرہ کے طور پر دینا لینا جائز ہے.

قال الفقيه أبو الليث رحمه الله تعالى اختلف الناس في أخذ الجائزة من السلطان، قال بعضهم: يجوز ما لم يعلم أنه يعطيه من حرام، قال محمد رحمه الله تعالى : و به نأخذ ما لم نعرف شيئًا حرامًا بعينه ، وهو قول أبي حنيفة رحمه الله تعالى وأصحابه ، كذا في الظهيرية. (فتاویٰ هنديه ،جلد 5 ،ص 421). وَالـلّٰـهُ تَـعَـالٰـي أَعْـلَـمُ بِـالـصَّـوَابِ.

كــتـــــــــــــــــــــبـــــــــــــــه الــــفـــــقـــــــيــــــر إلـــــــي ربـــــــــــــه الــــقــــديــــر :

أبـو الـحـسَّـان مُـحَـــمَّــــد اشــــتـــيـــاق الـــقـــادري.

خـادم الإفـتـاء والـقـضـاء بـــجـــامــعـة مـديـنــة الـعــــــلـم ،كـــبـــيـــــر نــگــر ،دهــــــــلـي 94.